Одоо Би Хайргүй

Өөрөөсөө ч илүү хайртай байснаа мартчихаж

Өөрийг чинь бас хайдаг байснаа ч больчихож

Юугаар ч солихгүй гэдэг сэтгэл минь хөрчихөж

Юутай ч харьцуулахгүй гэдэг итгэл минь цөхөрчихөж

Чамайг л бодохоор инээмсэглэдэг байсан, одоо үгүй

Чамайг л санахаар эмтэрдэг байсан, одоо үгүй

Чамайг л харахаар догдолдог байсан, одоо үгүй

Чамайг л гэхээр үхдэг байсан, одоо үгүй

Зүүдэнд ирсэн ч сэрээд би нүдэндээ нулимсгүй

Зурвасхан чи бодогдсон ч инээгээд би гуниггүй

Зөрөөд өнгөрсөн ч дараа нь би мартаад гомдлолгүй

Зуурдхан биш удаан хайрласан ч одоо би хайргүй.

Би "Худалч"

Би зоригтой гэдэг мөртлөө

Тас харанхуйд байхаас айдаг

Би бардам гэдэг мөртлөө

Дан хайрын өмнө өвдөг сөхөрдөг

Би ганцаараа байх дуртай гэдэг ч

Ганцаардалд автахаас үхтэлээ айдаг

Би аз жаргалтай байна гэдэг ч

Гагцхүү түүнийг л байнга хайдаг

Би үхмээр байна гэж хэлдэг ч

Үнэндээ амьдралд дэндүү хайртай

Би өчигдөр үзэн ядлаа гэдэг ч

Өнөөдөр болоход мартдаг гайтай

Би итгэл дүүрэн инээмсэглэдэг ч

Эргэж хараад нулимсаа арчдаг

Би эхлэл бүхэн төгсгөлтэй гэдэг ч

Эцэс нь ирэхэд эвлэрэхгүй аашилдаг

Би үнэн үгээр зэвсэглэн

Худал хуурмагаа далдлах “худалч”

Би үхэн үхэтлээ зөрчилдөн

Өөртэйгөө дайсагнах “тэмцэгч”.

Яг одооноос...

Дусал нулимсныхаа хамт

Дурлалын түүхээ эцэслье

Дундуурхан сэтгэлээ дүүргэн

Дуу аялан алхлъя.

Уруулаа будан

Даашинзаа өмсөөд

Урагш харан

Бардам байя

Өнгөрснийг дурсамж болгоод

Өнөөдөр шинээр эхлье

Өчигдрийг сургамж гээд

Өөдрөгөөр ирээдүй рүү алхъя.

Амттайхнаар дурлая

Яг анхных шигээ

Аз жаргалтайгаар инээмсэглэе

Яг урьдных шигээ.

Чи надад хайртай юм шиг хайргүй байхад Би чамд хайргүй юм шиг хайртай байсан

Чи намайг чагнадаг юм шиг сонсдоггүй байхад

Би чамайг сонсдоггүй юм шиг чагнадаг байсан

Чи намайг ширтдэг юм шиг хардаггүй байхад

Би чамайг хардаггүй юм шиг ширтдэг байсан

Чи намайг санасан юм шиг залгадаг байхад

Би дургүй юм шиг чимээгүй догдолдог байсан

Чи надад сайн юм шиг харьцдаг байхад

Би тоодоггүй юм шиг дотроо баярладаг байсан

Чи зүгээр л надтай ярьж байхад

Би зүрх сэтгэлээрээ сонсдог байсан

Чи зөвхөн найзаар намайг хардаг байхад

Би зүүдэндээ хүртэл хайрладаг байсан

Чи намайг боддог юм шиг үгүйлдэггүй байхад

Би чамайг үгүйлдэггүй юм шиг боддог байсан

Чи намайг хүлээдэг юм шиг аашилдаг байхад

Би чамайг аашилдаг юм шиг хүлээдэг байсан

Чи надад халамжтай юм шиг хамаагүй байхад

Би чамд хамаагүй юм шиг халамжтай байсан

Чи надад хайртай юм шиг хайргүй байхад

Би чамд хайргүй юм шиг хайртай байсан.