Шүлэг миний 
Уйлах тайтгарал
Сөхрөх шантрал
Мөрлөх түшиглэл
Уучлах эдгэрэл
Амьсгалах агаар
Аврагдах хязгаар
Өөрөөрөө байх цор ганц боломж
Өөртэйгээ л байх цор ганц оромж

Чи мэдэрдэг болов уу

Миний чамаас мэдэрдэг бүхнийг

Чи мэдэрдэг байгаасай

Чиний надад өгдөг шиг мэдрэмж бүрийг..

Дурласандаа

Дандаа л энгэрт чинь эрхэлмээр байдгийг

Дассандаа 

Дэргэдээс холдмооргүй хоргодоод байдгийг

Харамласандаа 

Халаасандаа хийгээд явчихмаар байдгийг

Хайрласандаа 

Харах бүрдээ л нандигнаад байдгийг

Өөр бусдаас өмөөрч өмгөөлдгийг минь

Өөрийн тань төлөө шаналдгийг минь

Өвдчих вий гэж зовдгийг минь

Алдчих вий гэж зовнидгийг минь

Алдсан ч гараас чинь тавихгүйг минь

Ахиад олон олон уучлахыг минь

Ахиад илүү илүү хайрлахыг минь

Ахиад илүү хайрлуулахаар шунахыг минь

Чи мэддэг болов уу..

Чи минь мэдэрдэг байгаасай..

Чамайг жигүүртэн болгочхоод би өөрөө тэнгэр болох сон
Дандаа дэргэд дүүлээсэй
Чамайг загас болгочхоод би өөрөө лус болох сон
Дандаа хажууд цэнгээсэй
Чамайг чи биш болгочхоод би өөрөө чи болох сон
Дандаа чамд оршоосой
Чамайг хайр болгочхоод би өөрөө зүрх болох сон
Үхтлээ чамаар цохилоосой

Хэзээ ч уншихгүй гэдгийг чинь мэддэг хэрнээ
Хэчнээн үгсийг чамд эвлүүлсэн гээч! Зүгээр харж байгаад хэлчих гэхээр Зүрх үхээд, үг хумигдаад Нулимс цийлэгнээд, хоолой зангираад.. Ингэж байхаар зүгээр бичье, юу гэхэв Мэдэх, мэдрэхгүй нь хамаагүй! Өмнө чинь очихоор нулимс болоод мэлэрчихдэг болохоор Өрөвдүүлэх гээд байгаа юм уу Өвтгөх гээд байгаа юм уу мэдэгдэхгүй Өөрийг тань шаналгаж байхаар Өөрөө л зүрхээ хэмэлж Үг холбоод цаасан дээр шаналлаа асгачихъя Таны сэтгэлд шивнэх гэсэн бүхэн энэ цаасанд л шингэг! Нэг ч гэсэн зүйл Намайг ойлгож, сонсож, тайвшруулдаг байх хэрэгтэй биз дээ...

Чи зүрхэнд алга
Чи зүүдэнд ч алга
Хажууд алга
Хайранд минь алга
Тэвэрт минь алга
Дэргэд минь алга
Гадаа гарсан ч
Гэрт орсон ч
Бороотойд ч 
Цастайд ч чи алга
Итгэлд ч алга
Цөхрөлд ч алга
Эргэн тойронд
Хаана ч чи алга

Харин дурсамжинд л байна.